用手機短訊溝通，最鍾意加個Emoji（表情符號）表達心情。有無試過完全棄用文字，純以Emoji描述一件事？俄羅斯IKEA最近喺Instagram招募食譜，玩法正係要參賽者用五個Emojis解構一道菜嘅製作方法。嘩，好難啫！

上面呢一串圖案就係獲獎作品之一：雞、雲、雪花、龍捲風同松鼠？究竟佢想煮乜嘢呀？

開估啦！幅圖其實係一份Brownie製作食譜。頭三個圖案分別代表雞蛋、糖、麵粉三種材料；龍捲風象徵攪拌；松鼠最難估！原來係借代松鼠最鍾意食嘅果仁（仲要係果仁朱古力），真係少啲創意都估唔到！

雖則遊戲玩法考起人，但大會最後都收到約300份作品，仲將20份拍成短片，放喺社交媒體播放，用以宣傳IKEA於莫斯科及聖彼得堡開設嘅「出租廚房」，鼓勵人多啲煮餸。