無綫熱播的《愛情食物鏈》今日踏入第二周，首播日已錄得27點佳績。上周五的一集何雁詩（Stephanie）飾演的楊金枝在快餐店徒手捉曱甴一幕被指抄襲28年前許冠文的舊作《雞同鴨講》，不少粉絲力撑撞蹺好平常；有口痕友卻狠批劇情胡鬧無期待，各位又認為TVB今次有冇做Copycat？

上周一緊接《刀下留人》的清新小品《愛情食物鏈》由陳智燊、高海寧主演，缺乏大牌演員壓陣，但首播日已錄得最高27點，一班年輕演員成功擦出火花。上周五播出的一集，扮演快餐店職員的何雁詩為了助老闆陳智燊逃避食環署檢控，在鏡頭面前竟徒手捉曱甴並放在圍裙的口袋中，場面惹笑。然而，該幕戲近日卻掀起話題，有指其構思勁似許冠文主演的經典電影《雞同鴨講》，不過一個是捉曱甴，一個是捉老鼠。不少網友認為抄少少無傷大雅；有人卻批評無綫抄蹺唔抵幫。

回應街頭親密 大呼核突

本報昨晚聯絡到Stephanie，對於被指抄襲許冠文的《雞同鴨講》，Stephanie強調未有聽過此事，但指那場戲只是增加喜劇效果，她說：「我都有少少驚，劇組有安排真曱甴畀我，但怕我駕馭唔到，所以無逼我捉，正式拍攝時有道具亦有真曱甴！」她又指稍後也有幾場玩蚊及昆蟲屍體的戲份。她透露上周劇集收視最高達27點實屬意料之外。提及其角色有不錯反應，她笑道：「我生得細粒走平民路綫唔太難捉摸，所以觀眾易接受！」

談到日前被拍得與韓籍男友在街頭親密擁抱，Stephanie大呼核突，她苦笑道：「男友好似我一樣是玩得之人，事後我們都有談及此事，雖然報道寫我唔差，但照片的動作唔好睇。」

撰文：Steven、Pat

編輯：余運慶

設計：鄧俊明

插圖：何樂