唐詩詠逼男友坐定定睇新劇

由黃德斌、唐詩詠、蔡思貝等主演的新劇《鐵馬戰車》今晚首播。德斌對於新劇能承接神劇《刀下留人》播出，除嘖嘖稱奇外，更對收視充滿信心。而唐詩詠就叫男友洪永城坐定定收看，以行動支持她。

昨日《鐵馬戰車》的宣傳活動上，獲電單車會提供29架總值逾800萬元的「戰車」撑場，幾位靚女見到有型的電單車亦忍不住坐上去擺甫士兼騷長腿，相當吸睛。

蔡思貝考電單車牌

唐詩詠被問到會否約洪永城睇首播時，她說：「我自己睇，佢都要睇，（會互相畀意見？）我盡量少畀，始終佢都新，好多嘢需要改善，反而覺得需要鼓勵多啲。」對收視充滿信心的她，表示角色性格跟現實有點相似。「拍攝時情緒起伏較大，因為有親人唔喺度，蔡思貝都有問我係咪唔開心，但我唔夠膽講，怕影響佢。」

蔡思貝則表示拍完該劇後愛上電單車，更立刻報名學，但之後工作太忙無暇考牌，現正積極抽時間再考。問到是否已獲男友麥秋成批准？思貝笑謂：「呢啲自己決定。（載埋男友？）一個人揸過癮啲。（夠唔夠膽載佢？）單車我都唔敢載人，何況電單車？」她笑言要浪漫的話應由男仔揸車，女仔從後攬住對方。

《刀下留人》收視有口碑，再有新劇推出，問到德斌會否有壓力？他說：「一個揸刀、一個揸槍，唔同嘅。」談到與蔡思貝合作的男藝人都會傳緋聞，但他卻成為絕緣體，德斌打趣表示：「哎呀，蝕底喇！不過今次我哋係飾演師徒關係，劇中佢好仰慕我，但我有家庭，背後有個好女人，令我專注工作。」

採訪：Pauline

攝影：林良明

編輯：林梓添

設計：鄧俊明