$90飲Decanter金獎酒

知道新世紀廣場（MOKO）最近開設年宵市集，噚日經過旺角，黛安特登入去逛一圈。

現場所見以賀年福袋最受市民歡迎，好似阿一（楊貫一）嘅鮑魚福袋，288蚊有鮑魚、百靈菇、鮑魚粥、鮑魚麵、XO醬同蟲草花，價錢係平時嘅65折，買嚟送畀男朋友媽咪，實用又得體。

$288有鮑魚臘腸花菇

自用的話，現場幾位親切太太同黛安講，安記福袋最抵。同樣係288蚊，有鮑魚、花菇、臘腸、螺片等六樣嘢。負責人Mandy話福袋早於上月工展會面世，之前日賣過千個，仲一度斷市。據講個福袋曾於內地炒高至700蚊，後來有內地客想大手採購500個，安記都唔畀，主要係想真正用家買到平貨。

福袋雖抵，但黛安目光全程無離開過一田嘅葡萄酒攤檔，酒架放滿Decanter世界葡萄酒大賽嘅得獎名釀。供應商合興隆產品採購部嘅Shirley向黛安推介，勝價比最高要數來自阿根廷、2014年產嘅ZORZAL。呢支紅酒唔單止係Decanter金獎得主，著名酒評家Robert Parker試飲完亦給予90分Outstanding評級。更值得一提係售價只係99蚊，加埋現場九折，埋單90蚊支，真係抵到爛！