我最喜愛商場選舉 新城市奪最佳手機App

黛安鍾意行街，喺商場有新發現都會開心share。近年各大商場想盡辦法各方面增吸引力，畀心機梗係值得讚，《香港經濟日報》主辦、《晴報》有份協辦嘅第四屆「我最喜愛商場選舉」，喺公眾熱烈投票同評審團嚴格遴選下，獎項經已名花有主。黛安都有機會見證，喺港島海逸君綽酒店舉行嘅「我最喜愛商場大獎2015─16」頒獎禮，獎項包括10個「我最喜愛商場」、25個「我最喜愛商場活動」。

K11獲最佳fb專頁

今年仲新增兩個數碼媒體營運獎項——「最佳商場Facebook專頁」同「最佳商場應用程式獎」，分別由K11同新城市廣場奪得。

主辦單位非常重視頒獎禮，除咗一眾評審做頒獎嘉賓之外，仲請咗香港旅遊發展局主席林建岳（岳少）同觀瀾湖集團主席兼行政總裁朱鼎健，分享商場營運與推廣心得。朱鼎健講起，觀瀾湖同華誼兄弟合作，邀請明星到訪觀瀾湖，增加觀瀾湖人氣。