一風堂食住拉麵變身幪面超人

「變身」幪面超人，可能是大部分男生的童年夢想，黛安記得，當超人帶埋嘰嘰兵「闖入」office做宣傳，只見全個office男士非常興奮，個個爭住影合照。如果可以親身「變」一次，應該都好想試！黛安前兩日去銅鑼灣，見一風堂又有幪面超人「助陣」，即刻同公關姊妹八卦下，原來上次龍蝦拉麵後，今期再同日本幪面超人crossover，推出嶄新配搭經典黑拉麵（Kuro）。品牌仲特登為咗配合「黑」呢個主題，喺特定分店加入遊戲體驗「體感變身機」，等顧客食麵之餘仲有得玩，做下幪面超人。

變身方法好簡單，只要完成變身動作，系統會根據表現評分，睇下係啱做幪面超人Black定嘰嘰兵。玩完遊戲後，仲可以scan上面的QR code下載個人變身視頻，同老友開心share！