奢侈品牌向來鍾意搵名模做代言人，不過LV（Louis Vuitton）最近一反常態，找來角色扮演類電視遊戲《Final FantasyXIII》（下簡稱《FF》）的虛擬女主角Lightning擔任代言人，宣傳2016年春夏季新產品。

LV的創意總監Nicolas Ghesquiere日前在社交網站Instagram上載影片。片段由《FF》遊戲開發商SquareEnix製作，所以畫象同遊戲質素相若。短短十幾秒的廣告中，只見呢位型格十足的虛擬女主角，拎住新一季的LV袋，做出遊戲中躍起及旋轉等動作，不少網民睇完後大讚有型；而Nicolas自己就形容，起用Lightning係現實與幻想的結合。

黛安都覺得段片令人對LV感覺耳目一新。唔知用呢類遊戲角色拍廣告，會否增加男士買袋畀女朋友嘅意慾呢？