【聲明】港生活網站並無進行電話推廣活動

銀通下季推新平台 有手機號碼就過到數

發佈時間: 2016/01/21

朋友過數畀你通常會問:「用邊間銀行?」遲啲大家會問:「你手提電話係?」黛安唔係講緊「抄牌」方法,而係銀聯通寶(銀通)今年第二季推出嘅「JETCO Pay P2P(個人至個人)服務」,過數畀人唔使再問戶口號碼,有手提就搞掂!

好多人問,唔同銀行都得?使唔使畀charge先?銀通行政總裁蔡炳中(Angus)話,會員銀行第二季會陸續推出JETCO Pay P2P服務,到時完成登記手續,在App綁定銀行戶口,可隨時轉帳,對方即時收到;佢仲話相對其他地方,香港P2P轉帳使用率較低,希望加深消費者對P2P轉帳用途同優點嘅認識,服務會完全免費。

據黛安了解,現階段銀通已同12間銀行合作,大家可以選擇其中一個戶口收錢,「暫時設定收錢限一個戶口,用作支付戶口則可以有多個」。Angus強調,除咗方便快捷、易用之外,佢哋最重視安全,「JETCO Pay P2P會用銀通現有自動櫃員機平台,每次轉帳都要輸入密碼。」

撰文: 黛安 消息特靈八卦公關
欄名: 八卦名利場