海港城潮歎朱古力配威士忌

大家今日去海港城會聞到陣陣「朱古力香」，因為「情‧尋朱古力」活動開始咗。黛安聽海港城姊妹講起，今年第一次開Chocolate Trial Café，大家品嘗世界各地搜羅返嚟嘅優質朱古力之餘，仲有新嘗試——配搭威士忌、紅酒、中西茶、咖啡同特色飲品嘅朱古力Tasting Menu。

噚日有得率先試，一邊聽品酒認可導師李凌霄（Louis）同朱古力品嘗家陳嘉恩（Katie）分享，一邊品嘗唔同配搭。講起揀邊款威士忌，Louis話，「入門可以簡單一點，甜味嘅酒配甜度較高嘅朱古力、果香重嘅酒配果味較濃等。最緊要個個人口味唔同，邊試邊搵自己喜愛口味。」Katie就同黛安講，要品嘗朱古力味道，唔好太快吞晒成塊朱古力，放在條脷上等佢慢慢融。配酒或茶時，亦可以等朱古力差唔多融晒，再飲啖茶或酒，會發現有唔同味道提升咗。

今次試食，黛安最有印象係威士忌「SMWS 27.109」同兩款朱古力嘅配搭，分別係Doromi嘅Lattesal同zChocolat嘅Z雙層夾心白朱古力。呢款威士忌出自蘇格蘭Campletown，聞落好重煙熏味，入口有點鹹味，令人意外係帶點鹹味的酒遇上Lattesal中的海鹽，感覺很夾。另外，Z雙層夾心白朱古力望落好似好甜，但一咬開滿口榛子味，再配一口威士忌，加分！。