直徑13厘米「巨人蘋果」 一田有得賣

新年諗住買啲咩向親戚拜年？黛安見到最近一田eShop的賀年禮籃有一款巨型蘋果，賣相好吸引，事關每個蘋果嘅直徑有成10至13厘米咁長，「腰圍」更加有41厘米闊。細讀介紹，原來呢款「巨人蘋果」屬於日本最高級別嘅「極選青森世界一蘋果」，每100個先有1個入選「極選」級！呢種蘋果平時喺香港唔多見，現時喺一田賣緊788蚊一盒（有9至10個）。

此外網店仲有好多矜貴水果，譬如日本宮城縣嘅MIGAKI-ICHIGO「千円草莓」，粒粒夠大仲呈圓錐形，甜度達15度或以上，每粒身價值成千円，依家一盒六粒賣298蚊。提提大家，禮籃訂購日期去到下星期三（27日）㗎咋！