黛安
黛安

招聘廣告寫衰份工 求職者反而仲多

發佈時間: 2016/01/22

招聘廣告寫衰份工 求職者反而仲多

平時睇求職廣告,格式千遍一律,就咁寫職位、工時、所需技能等等。喺失業率低、多個行業求才若渴嘅情況下,呢類廣告實在好難突圍,事關求職者睇完都未必對間公司有印象。

最近澳洲公司Julien Viard就好有創意,以「城中最差工作」喺招聘網站落廣告請Senior Digital Producer,仲寫到份工好衰,譬如話工作地點欠佳、薪酬低於市場水平、經常處理麻煩顧客等,反吸引唔少求職者查詢。

負責人話,佢哋已經厭倦嗰啲一味吹噓份工有幾好嘅招聘廣告,希望作新嘗試,以呢類自嘲式文字向求職者傳達份工嘅真實狀況,如果對方見到份工咁衰仲肯嚟見,請到合適人選巳嘅命中率應該更高。不過負責人亦謂,呢種招聘方法佢應該唔會再用第二次喎。

撰文: 黛安 消息特靈八卦公關
欄名: 八卦名利場