【聲明】港生活網站並無進行電話推廣活動

7仔金鐘開Café 必試黑松露腸粉

發佈時間: 2016/01/22
  • 1,000次
    分享

收到7-Eleven姊妹傳相,黛安一睇,「環境唔錯噃,一齊食tea啦,邊度嚟㗎?」原來7仔喺金鐘力寶中心新開Daily Café!睇poster寫住「Beyond a 7-Eleven」就知唔簡單,黛安梗係拿拿臨去試,行入概念店,裝修黑色為主、燈光走微黃色調,心諗:「好唔7仔feel」,姊妹話:「係呀,想型格啲!」

宣傳單張寫「Fresh Fabulous Food」,食物方面又點先?行一圈發現不得了,一日幾餐都唔會撞款!早餐西式有薯蓉杯、乳酪、麥片,最特別係黑松露腸粉,驟眼睇以為係麻醬,其實係菇菌醬配黑松露,真係試過先知原來佢哋好夾。

午餐之選推介Noodle Bar,麵底四揀一、湯底三揀一,素食者都有得揀。食得辣,黛安建議你試咗冬蔭公湯配韓國水晶粉,一來呢排天氣咁凍,二來呢款湯每兩個禮拜轉一次,下次未必係呢款。

到下午茶想食得light啲有新鮮沙律,飽肚有好多款三文治,聽講當中好多都係呢間店獨有!仲覺得唔夠多選擇?就要留意每日三個時段出爐嘅牛角包,再配埋駐場咖啡師出品自家即磨咖啡,有埋拉花圖案,杯咖啡自然變得不一樣!

撰文: 黛安 消息特靈八卦公關
欄名: 八卦名利場