黎明谷新片 開fb惡搞靚樣 粉絲讚可愛調皮

黎明近日忙於為新片《消失的愛人》四出宣傳，鮮有在社交網站與粉絲互動的他，日前突然在fb開設個人專頁，而最令粉絲驚訝的是，平時嚴肅的黎天王竟然惡搞自己個俊俏樣，引來大批粉絲驚呼「是你嗎」，有粉絲大讚黎明調皮任性，你又覺得黎天王係咪好可愛呢？

黎明為力谷新片《消失的愛人》，本周二在微博跟粉絲互動，他寫下留言：「一連三次行動代號LLLeonLai！」及後他再用代號名稱在fb開設個人專頁，隨即引來大批粉絲讚好追蹤。

黎明見「行蹤」被發現又調皮回應：「你搵到我啦！」不過，一向走靚仔白馬王子路綫的黎明，竟將自己的靚樣用電腦特技加上牛角、妖怪貓眼及含住奶嘴的「三不像」，樣子趣怪，引來不少粉絲起哄，有粉絲笑問黎明是否走諧星路綫，亦有粉絲留言叫黎明換過另一張帥照。

瓊姐「擦鞋」補鑊

在黎明開設fb專頁後，他發現網絡紅人瓊姐狂踩其新片《消失的愛人》宣傳海報像「衞生署宣傳緊化驗室種菌實驗」，黎明除了大方轉載外，又風趣留言給瓊姐：「多謝你咁留意我！」令瓊姐又驚又喜，並且即時補鑊，開設新post狂擦黎明鞋，大讚這位「金句王」的金句發人深省及有深度。瓊姐留言：「Leon咁玩得，又為咗表揚佢金句王呢個美譽，本人特製呢批金句圖，孝敬黎生、佢班fans，同埋大家。」瓊姐咁識做，相信黎明都唔會咁小氣嬲嬲豬啦！

撰文：Pat

編輯：余運慶

設計：鄧俊明

插圖：何樂