【聲明】港生活網站並無進行電話推廣活動

恒隆陳南祿潮買H&M 再帶隊歎Starbucks咖啡

發佈時間: 2016/02/02

上星期行過旺角,發現恒隆地產旗下家樂坊裝修完成啦!開幕焦點,離不開H&M九龍區全新概念旗艦店同星巴克(Starbucks)特色店。黛安同恒隆姊妹傾開先知,開幕日一班管理層帶隊,先去H&M旗艦店shopping,再去Starbucks歎咖啡,果然追貼潮流!

話說開幕前一日恒隆公布完業績,開幕當日管理層喺旺角office同員工開會,之後就浩浩蕩蕩去參觀三層高嘅旗艦店,H&M大中華區總經理Magnus Olsson仲親自介紹𠻹,個個都話體驗深刻。黛安聽講,佢哋唔只行個圈咁簡單,好似恒隆地產董事總經理陳南祿(Philip)揀咗件灰色長袖衫,仲即買即換,西裝look變身休閒風,件衫着得佢幾有型,真係要畀個Like!恒隆地產董事(租務及銷售)陳家岳(Norman)都話,家樂坊一直係本港年輕人購物熱點,今次翻新升呢,吸引國際品牌進駐,相信會為顧客帶來全新購物同消閒體驗。

Shopping後佢哋再去Starbucks,同香港及澳門星巴克執行董事曾廣堅(Norbert)、營運總監郭百祥(Patrick)會合,齊齊坐低歎番杯Coffee master特別沖調嘅精品咖啡,呢個下晝夠晒歎!

撰文: 黛安 消息特靈八卦公關
欄名: 八卦名利場