新春利市封巡禮 新穎吉祥圖案搶眼

臨近農曆新年，老友們全部忙住CNY宣傳，黛安都收到佢哋送嚟利市封，個個都好靚，梗係要開心share！好似K11就同本地設計團隊Pengguin合作，設計四款利市封，「百花發」、「躍金扉」、「知魚樂」同「志凌霄」。四款設計用現代手法演繹傳統吉祥圖案，分別寓意花開富貴、時來運轉、年年有餘同步步高陞，黛安覺得每一款都好好意頭！

今個星期日前，Klub 11會員消費滿1,088蚊，加2,000 Klub積分就換到呢款利市封；其他顧客消費滿港幣1,388蚊，都可以免費換領。

另一款好搶眼嘅，係海港城用大自然元素同中國傳統五行做設計概念嘅利市封，用好有現代感嘅幾何圖案，變成「太陽」、「雲」、「山」、「葉」，分別代表朝氣蓬勃、風調雨順、步步高昇同生機處處。海港城仲配合利市封，推出走型格路綫、桃紅色clutch Size利市袋。