【聲明】港生活網站並無進行電話推廣活動

猴年利市封 馬騮仔逐個捉

發佈時間: 2016/02/04

噚日同大家分享過設計精美嘅利市封,有姊姊就提起,「猴年喎,無馬騮仔主題咩?」點會無,黛安收到好多「應節」設計,款款都好有馬騮仔嘅活力。據office仝人票選,「有型」之選係京劇《西遊記》look美猴王--朗豪坊嘅「八面威封」,美猴王京劇臉譜夠晒醒神,用埋熒光粉紅色,一拎出嚟已經好搶眼。想型住派利市,今個星期日前,喺商場內即日消費滿500蚊,參加「新春大抽獎」,可以免費換領。

如果想走可愛風,東薈城嘅「猴年得意」利市封亦係唔錯選擇,手感十足嘅立體金絲絨毛,條馬騮尾巴真係好得意!想人哋收到利市時,都會講「好得意」,情人節前喺商場內消費滿2,000蚊,就換到一套㗎啦!

除此之外,如果想簡約一啲、含蓄一啲,黛安覺得,新城市廣場嘅「金猴獻瑞利市封套裝」就啱晒你!四款利市封用咗強烈對比色,加上四個簡單圖案,一睇就知代表今年嘅生肖,仲反映到馬騮仔四種唔同神髓同性格。如果想換呢款利市封,就要把握時間,今個星期日前,去新城市用電子貨幣消費滿800蚊就有得換!

撰文: 黛安 消息特靈八卦公關
欄名: 八卦名利場