「太監四虎」流落民間 黎耀祥笑做奴才 不失霸氣

過年自然要輕輕鬆鬆笑餐飽，無綫將於大年初二推出兩部賀歲劇，作為頭炮的《公公出宮》由「太監四虎」黎耀祥、蕭正楠、陳國邦及曹永廉掛帥，四人由紫禁城「淪落」到女兒國，發揮宮中生存之道，將主子胡定欣侍奉妥當。

「太監四虎」在2012年台慶劇《大太監》中已合作無間，今次四人盡情發揮喜劇細胞，監製羅永賢大讚：「佢哋私下好老友、好有默契，尤其祥仔用久違嘅喜劇感，去演一個不折不扣嘅小人物，效果好出色。」劇中眾人各有所長，例如祥仔擦鞋功力一流、陳國邦醫術高明，「至於最『乸型』嘅曹永廉係化粧達人，個個妃嬪爭住用佢。」

定欣夏薇女權當道

該劇另一亮點，在於顛覆古代男尊女卑的傳統觀念，「太監四虎」投靠到女權至上的金家村，日日要睇當家胡定欣、林夏薇的面色做人。監製羅永賢笑言男女的角色反差，正是全劇最搞笑之處。「胡定欣好似慈禧，祥仔喺側邊輔助佢；而林夏薇演男人婆，不但主動追求曹永廉，仲成日非禮男方，摸佢Pat Pat！」

撰文：李潔盈

編輯：林梓添

設計：鄧俊明