【聲明】港生活網站並無進行電話推廣活動

$1580海洋公園紮營過情人節 劉鳴煒:親自下廚煮飯仔

發佈時間: 2016/02/05

臨近農曆新年,黛安同海洋公園管理層食飯,包括主席孔令成、副主席劉鳴煒、行政總裁苗樂文、副行政總裁李繩宗、營業及市務執行總監李玲鳳、同園內營銷執行總監梁啟誠等。講起過完年好快到情人節,唔知大家有咩plan?劉鳴煒話諗住「煮飯仔」,仲好有信心話「梗係我煮」,睇嚟廚藝應該有番咁上下。

唔係個個識煮飯,想甜蜜過節去邊好?李玲鳳就話,海洋公園情人節浪漫套票係唔錯選擇,反應仲好踴躍𠻹,預訂都已經有七、八成。情人節package有咩特別,黛安聽公關姊妹講,情侶可以參加特別版「神秘深海之旅」,先夜遊「冰極天地」睇海獅海豹,再由教育大使帶領下,去「尋鯊探秘」紮營,聽大使分享鯊魚不一樣嘅「愛情故事」。呢個旅程未完結,大家仲可以喺入面,徹夜觀賞海洋生物,齊齊倒數,迎接情人節,成人每位$1,580。

情人節正日又有咩選擇,姊妹就話,情侶揀「特選浪漫情人節親親動物套票」,食情侶套餐之餘,仲可以參加情人節版「企鵝全接觸」,仲有潛水員喺水中幫你展示愛的宣言,夠晒浪漫!

撰文: 黛安 消息特靈八卦公關
欄名: 八卦名利場