馬會贊助1.6萬位小一生學游水

同馬會高層食飯，預早慶祝猴年來臨，馬會行政總裁應家柏講起，照依家經濟狀況睇嚟，賽馬博彩投注額可能會減少百分之三至五，不過收入減少，投放喺慈善項目嘅資源唔會減！其實，睇馬會慈善信託基金呢兩年「加碼」幅度就知，馬會好重視社會公益，好似慈善信託基金的慈善捐款近兩年由十幾億元增加至近39億元，資助慈善同社區項目達189個。

應家柏仲講起好消息，倫敦財經報章City A.M.公布「世界慈善指數2015」，馬會憑14/15年度近39億港元慈善捐款打入第六位，係首次有亞洲機構晉身前十名，認真威水！

黛安又聽馬會慈善及社區事務執行總監張亮講，今次有三大重點，分別係青年、長者同體育。原來馬會留意到，過去幾年小學生體能愈嚟愈差，有幾多學生唔識游水，所以今年其中一個項目係同泳總合作，贊助約1.6萬位小一學生，即係全港約一半小一生學游水，「起碼要游到20米，因為據統計，游到20米代表萬一浸親，都有能力自救」。