執狗屎不慎燒燶頭髮 吳若希忍痛剪七吋長髮

吳若希（Jinny）與鄭俊弘昨日齊齊現身電台接受訪問，Jinny約三點已經抵達，鄭俊弘因要先完成另一個電台訪問，加上塞車，導致遲到了少許，當他和Jinny碰面時，二話不說宣傳自己剛推出的新碟，場面相當搞笑。

昨日剪了短髮的Jinny受訪時自爆瘀事，她說：「之前喺廚房彎身執狗屎時，一直無為意爐頭煲緊湯，就在彎低身嘅時候，原來頭髮就在爐頭邊，聞到燶燶哋才發現原來頭髮燒着咗。」原本長及腰間的頭髮，最終因為意外燒燶了而被迫剪掉六、七吋，說罷她既無奈又尷尬。

還有幾日就過年，Jinny透露完成今日的活動就正式收爐，預計放十日假，先返家鄉福建跟親友拜年，之後回港休息。她笑言：「鄉下習俗，出來工作後就要派利市，所以都會派畀小朋友，不過鄉下𢭃利市的機會唔多，我會返香港努力𢭃利市。」問她是否很窮才四出𢭃利市？她否認，並解釋𢭃利市只是意頭，今年派利市跟往年一樣，預算在五位數字之內。

希望細佬聽話生性

談到新年願望，Jinny希望細佬生生性性，不要讓她激心，她說：「每次返屋企都見到佢打緊機，有時睇唔過眼好𤷪。又唔可以收起部機，因為佢用緊我部電腦，平日做功課都要上網做。」之前試過有小孩子沉迷打機，亦因為買不到武器而激動到跳樓，不過Jinny笑言細佬畏高，應該不會跳樓，以他的性格相信不會做傻事。有人提議她可以扣他零用錢，Jinny說細佬有自己一套賺錢之道，會用零用錢買打機的卡，有時抽中限量版就以高價賣出，笑言投資方面他比自己更叻。

採訪：Pauline

攝影：林良明

編輯：黃寶恩

設計：鄧俊明