今個農曆年檔期，三部本地薑《賭城風雲III》、《美人魚》及《西遊記之孫悟空三打白骨精》，未開畫已經一輪宣傳戰、口水戰，觀眾食住花生等睇戲，其實想知罷睇王晶究竟是否奏效？「星爺」周星馳又是否仍有魅力吸客？相信好快自有分曉。

相對之下，動畫及合家歡片較為失色，《恐龍大時代》及《花鼠明星俱樂部：開心大唱遊》水準唔算高，尤其是《恐龍大時代》被「歎慢板」，等到學校長假期才在港上映，唔夠新鮮滾熱辣，正如《功夫熊貓3》日前已在內地搶先開畫，香港觀眾卻要再等下個學校假期，到復活節前才有得睇，排陣真的有票房保證嗎？

Pixar動畫《玩轉腦朋友》創意十足個個讚，接棒的《恐龍大時代》Package雖好，但有壓力。故事講小恐龍與小野人流離失所，在尋找回家之路經歷大冒險，患難見真情，絕對適合一家大小觀眾，只可惜格局過於傳統，稍欠新意。