1月中野蠻港女上山睇結霜被阻怒罵警員驚變全城熱話，早前阮兆祥惡搞事件拍攝《阮兆祥2016硬食2 -拜年篇「條命係阮兆祥自己」》短片賀歲，並於年廿九在網上發布，至今已錄得近20萬點擊率。不少網友激讚他抽水抽到農曆新年；有人卻嫌棄他又扮女人悶到爆，各位覺得祥仔扮得夠唔夠無賴？

入行超過30年的阮兆祥歌手出身，自從轉戰電視圈後多以主持及搞笑角色示人，10年在扮嘢節目《荃加福祿壽》與王祖藍、李思捷齊齊彈起，三人於同年尾與汪明荃舉行《荃加福祿壽宇宙最長演唱會》，並在11年與阿姐拍攝劇集《荃加福祿壽探案》，又拍攝邵氏投資的電影《勁抽福祿壽》，將「福祿壽」三個角色玩到盡。

然而，自從近年王祖藍北上發展，並憑浙江衛視真人騷《奔跑吧兄弟》於內地大紅大紫，福祿壽已甚少聚頭再作幕前演出，反而祥仔繼續在港以搞笑方式在娛樂圈佔一席位。他在14年尾於灣仔伊館舉辦棟篤笑《2014硬食博覽》，罕有地惡搞政治人物，化身「四點鐘阮Sir」及「齊陰的母親」，扮得入型入格，同時亦贏得各界讚賞。

上山睇結霜變拜年

事隔不足兩年，祥仔曾預告今年五月將再踏舞台搞棟篤笑，日前年廿九率先在YouTube上載了惡搞短片賀猴年，喪抽上月本港天氣急降期間到大帽山睇結霜被警員阻撓的野蠻港女，片中的祥仔抄足對方着短褲加leggings，又港女上身怒轟有人阻他上山拜年𢭃利巿。

此外，祥仔在短片中高喊「點解要限制人嘅自由喎？」、「你唔好咁Nonsense啦！」等經典金句，贏盡網友掌聲兼狂掃近20萬點擊。祥仔與拍檔於結尾更恭祝全港巿民「龍馬精神永無nonsense」，預告將有第二波短片。不少網友睇完都激讚祥仔抽乾該名野蠻港女；另一方面，有意見卻嫌他繼齊陰媽媽、盧覓雪後再扮女人唔夠新意。

協力：采兒編輯：余運慶

插圖：何樂設計：鄧俊明

撰文：Steven、Pat