同麥當勞傳訊部一姐林婉梅（Wendy）飯聚，唔經唔覺，Wendy上任已經近五個幾月，黛安數數手指，呢半年每次活動見到佢都有好消息，即刻八卦問佢呢排忙緊咩？Wendy笑一笑問：「今日有無食麥當勞早餐先？」原來上星期五開始，大家食麥記熱香餅，除咗果醬又多個選擇，有得揀Skippy花生醬！

制服轉新look 為香港打氣

唔只早餐有改變，Wendy提起，公司時不時做research收集意見，最近「徇眾要求」推出更多選擇，大家以後食超值套餐，可以免費將薯條轉粟米，唔使加四蚊啦！唔知大家會唔會好似黛安咁，有時「夜媽媽」想落街買個麥當勞餐，但諗一諗「食晒包薯條咪好肥」，又要「天使魔鬼」交戰一番。今日開始，有得免費轉粟米，健康啲之餘，可以慳番四蚊雞！

講下講下，Wendy拎咗幾個麥當勞外賣凍飲杯出嚟，睇真啲先發現，呢幾個杯「外有乾坤」，用咗好搶眼嘅顏色，黛安個人至鍾意係shocking pink。Wendy話，今年開始全球麥當勞陸續轉新look，香港區都趁住農曆新年，轉番個「醒神」新形象，同大家打打氣咁話！

話明轉新look，點會淨係外賣杯同紙袋有新設計？大家今日去麥當勞都會見到，服務團隊嘅制服，換晒「sharp醒」顏色，分別係紅、藍、綠、黃，襯埋四款經典美食，包括巨無霸、魚柳包等。行入麥當勞，未落order先見到着新制服嘅佢哋，心情都即刻開心晒，同campaign主題——「周圍都係開心色彩」非常夾！