噚日同迪士尼管理層食飯，聽CEO金民豪講迪士尼2015年度業績，黛安真係想要講句「CEO唔易做」！話說，飯局中午12點40分開始，金民豪先分享講各項業績數字、前景預期，跟住大家邊食邊問問題：「未來點睇上海迪士尼、港珠澳大橋」等等；佢都好有耐性，逐個解答。終於，大家差唔多問完，黛安望一望錶，「嘩，原來已經下晝2點30分，足足講咗110分鐘」！再望一望張枱，心入面再「嘩」一聲，頭盤、主菜、湯全部未掂過，皆因席間個個輪流發問，金民豪忙住回應，結果幾乎無食過嘢！

小熊Duffy吸金 今年開主題商店

回想110分鐘，雖然數字上業績偏軟，但不乏正面消息，好似迪士尼樂園商品銷售就令人有驚喜，例如迪士尼小熊Duffy同ShellieMay產品非常受歡迎，銷售勁升七倍，嚟緊幾個月佢哋仲計劃，開設用Duffy同ShellieMay做主題嘅商店，一於食住個勢！

除咗迪士尼小熊，《星戰》主題同樣受粉絲支持，黛安聽講，明日世界嘅「飛越太空山」將會全面升級，變身充滿《星戰》feel嘅「Hyperspace Mountain」。《星戰》粉仲有機會參加「武士學堂」，跟「尤達大師」學用激光劍𠻹！