凌緣庭幫金龍醒獅點睛 海港城新春賀歲

迎接農曆新年好重要，海港城每年新春賀歲慶典絕對係年度重要節目，黛安噚日都去咗睇金龍同醒獅表演，仲見到好多熟悉面孔，例如九倉執董凌緣庭（Yan）、海港城推廣及市場部助理總經理譚嘉瑩（Karen）等。海港城今年再次請到好有分量嘅名人助陣--巨星劉嘉玲（Carina），Yan同Carina齊齊敲大銅鑼，再幫金龍同醒獅點睛，祝願所有人猴年順境。

現場睇金龍「帶」住五隻醒獅表演，氣氛十足，醒獅仲大派馬騮公仔，成功「接福」嘅觀眾都好開心。Karen心情靚爆，仲提大家摸金龍時「記得由頭摸到尾」，攞個好意頭「年頭好到年尾」。除咗表演，海港城仲請堪輿學家李丞責分享猴年行運貼士，丞丞師傅話雖然零售業可能面對調整期，但海港城商戶地利位置佔優，又建議裝修時可「用多啲綠色」，因為綠色係桃花色。