相信每個人身邊總有幾位精明消費專家，黛安覺得Visa產品開發總監Ada（羅格知）絕對係其中之一。噚日黛安同Visa一班管理層食lunch，期間從Ada口中得到好多食買玩嘅着數情報。

其中一個方法，就係要善用身上所有信用卡。大大話話，黛安一個人都擁有六、七張信用卡，但除咗儲積分同里數，平時好少盡用信用卡公司優惠。如果唔係Ada教路，黛安都唔知拎住Visa Infinite卡者或Signature卡，去五星級酒店如Grand Hyatt Steakhouse，或者怡東酒店嘅ToTT's and Roof Terrace食晚飯，有買一送一優惠；更加唔知有Visa Concierge呢項個人化秘書服務。

Ada話，之前佢去法國郊區滑雪，旅途上需要買多個篋，要求多多嘅佢打畀Visa Concierge，指明要某牌子、某型號嘅篋，仲指名要個篋能過到美國安檢；秘書不消1日就回覆最近佢嘅銷售地點，可惜無Ada想要嘅型號，秘書於是提出幫Ada喺巴黎買定，到時機場交收，真係貼心到加零一。

聽完佢咁講，黛安決定今個周末要坐低好好檢視所有信用卡優惠，學Ada咁做個精明消費者。