被指大食懶 全職媽媽呻無地位

全職媽媽唔易做。有港媽呻夫家親戚不滿她辭工湊仔，嘲諷她是「大食懶」，慨嘆全職媽媽不被尊重。有婦女團體指部分家庭視全職主婦為依附物，地位及話事權較低。社工建議多跟配偶溝通，以獲得支持。

新一代父母重視子女教育，部分家長會放棄工作，全力照顧家庭。有全職媽媽在討論區呻說，夫家親友不滿她辭工湊仔，冷嘲熱諷指她是「大食懶」，慨嘆無收入就無地位，全職媽媽不被尊重。帖文指，「自己湊就大食懶，去返工搵得萬幾（蚊）又要畀工人、保母，自己返工食飯搭車置裝又一筆，畀奶奶湊又被人話要靠奶奶無骨氣」，為此感兩難。

港媽被奶奶抱怨不工作

文章引起部分港媽的同感，有人說她的奶奶曾是全職母親，仍常埋怨新抱不工作，甫見她穿新衫及挽新袋便「單打」，「心痛到好似用佢啲錢買嘅」。亦有人說朋友常以為「湊仔就好得閒」，惟不知有多辛勞。另有姊妹慨嘆做女人真慘，「全職媽媽又話大食懶，返工又搞唔掂個細路」。

婦女服務聯會主席歐陽寶珍坦言，部分欠開明的長輩礙於全職媽媽無收入，視她們如依附丈夫生存，地位亦較低。「最常聽到如『點解唔做嘢呀』、『讀咁多書嘥晒』的說法，有些婦女聽到都唔知點回應。」她又說有些媽媽因收入減少，使費變得審慎，減少跟親友飯聚而「有說話聽」。

過分操練子女 隨時壓力「爆煲」

香港基督教女青年會家庭健康促進中心單位主任施倩俐指，部分婦女轉為全職媽媽後，礙於家人的說話及期望，或會過分操練子女，又或過分寵壞孩子，隨時令壓力「爆煲」，甚至損害親子關係。「有婦女不自覺將工作的要求放在孩子身上，譬如兒子考90分仍不滿意，反問『點解唔拎埋嗰10分』；有些婦女就長時間監視子女一舉一動，令他們反感。」

施倩俐說，無論是全職爸爸或媽媽，大部分都想有更多時間陪伴孩子成長，有感機會錯過了便不可重拾。最重要是他們和配偶清楚自己的理念，重視親子關係而非僅以孩子成就衡量是否值得。建議全職照顧家庭外，也要有社交及私人時間，適當與丈夫分擔家庭工作。