有事寧願睇跌打 Bosco唔急搵女友捽藥酒

王浩信昨日拍劇受傷，可幸情況不算嚴重，毋須留醫；好兄弟的黃宗澤（Bosco）亦有致電慰問，更自爆幾年前拍劇，背部亦曾受重創，經過那次後，他更愛惜身體，但笑言不用急於搵女友幫自己捽藥酒。

黃宗澤、朱千雪、陸永等到尖沙咀商場的露天廣場為劇集《警犬巴打》宣傳，可是天公不造美，眾人在雨中匆匆忙忙進行一連串活動。其中一個環節，眾演員與台下粉絲互動，一名內地女遊客獲邀上台後不肯離開，直至Bosco來個愛的抱抱，女粉絲才依依不捨落台。

Bosco近日忙於拍攝新劇《幕後玩家》，他得悉王浩信拍戲時受傷，亦已致電慰問，他說：「拍戲整傷經常會有，不過未試過好似佢咁嚴重。我最傷一次係拍《黃飛鴻》，嗰場打戲成個人跌落門檻，仲要係背部着地，當場痛到唔郁得，我直頭喊咗出嚟，好彩唐佳師傅攞藥酒幫我捽。（識個女友幫你搽藥酒啦！）我成日開工又周圍飛，搵女友嘅話，對方一定要好獨立，搽藥酒呢啲事搵跌打醫師啦。」昨日元宵佳節，Bosco直言有人約，不過是與劇組一眾演員共度。

朱千雪：我唔係佢杯茶

仍是單身的朱千雪就直言忘記了昨日是元宵節，在外國長大的她，心中一直只有西方情人節，問她是否想拍拖？她笑言：「有咪拍囉。（黃宗澤單身喎，佢想搵個性格獨立嘅女友。）我好鍾意依賴人，咁唔啱佢喇。」

屬狗的陸永本來今年運程一般，偏偏他在活動上贏了一隻足金金猴，令他喜上眉梢。他開心表示：「我冇抽獎命，今次第一次，不過個個叫我請食飯，相信食『麥當當』都要蝕。」他說還未諗到將金猴放在哪兒，但就一定不會讓兩個女玩。「今年畀幾個相士批算過，蘇民峰話我紅足幾廿年，丞丞（李丞責）師傅就話今年高大靚仔嘅會發展唔錯，我都算高大，不過靚仔就見仁見智啦。」

採訪：Pauline

編輯：林梓添

設計：招潤洪