去澳門英皇娛樂酒店歎得獎名菜，席間有前高官兼名食家葉澍堃（葉Sir）、《經濟日報》專欄作家曾智華等。最令人驚喜呢道菜，一上枱人人「嘩」一聲，跟住電話「咔嚓」不停。望落以為係人參？其實係大廚花好多工夫製成嘅「宮廷千層人參酥」！

黛安聽酒店中餐行政總廚林國榮（Tony）講，人參多數用嚟燉湯，甜品係新嘗試，難度幾高：「人參受熱有澀味，設計時不斷嘗試，最後將鮮人參磨成粉再分兩部分加入，蓮蓉餡加少少；炸完再將人參粉灑上。」咁花工夫，唔怪得入口啖啖甘甜，仲曾經奪得澳門旅遊學院嘅金襟針獎。Tony又透露：酥皮搓咗好多層，全靠師傅巧手先做到像真度高嘅造型，仲話：「好多人以為人參腳係真人參鬚，其實係芫荽嘅根部嚟造㗎！」

呢道甜品只係「冰山一角」，酒店中菜廳皇廷閣為慶祝酒店開業十周年，特別將系列重點推介菜式組成「皇」金盛宴。998蚊套餐有八道菜，除咗人參酥，仲有椰子水魚湯、黃湯燉花膠、七色紫蘇炒鮑魚等。每道菜由用料到煮法都唔簡單，紫蘇炒鮑魚仲係亞洲名廚金獎得主；難怪連葉Sir都讚，「落足料，但價錢唔貴喎」。酒店飲食部總監譚國基（Kenneth）就話，除咗皇金盛宴套餐，皇廷閣嘅點心同樣每日用心製造，務求客人以相宜價錢就食到。