港大廣東話拜年 馬斐森有「貓紙」

噚日好多傳媒行家喺港大，港大校長帶埋班同事一齊新春團拜，雖然唔少同事都係外國人，唔識中文，但都講番幾句祝賀說話應吓節，好似「猴年順景」等。黛安覺得佢哋廣東話都幾正吖，回頭一望，原來有人「提水」，攝影師哥哥好勁，一手影相一手舉住「貓紙」。

今次同大家拜年，校長仲帶咗一位「特別嘉賓」，就係愛犬Darcy，狗仔一出場，得意神態吸引大家，閃光燈閃個不停。唔講唔知，原來Darcy係馬校長由英國帶嚟香港，一家一齊住喺港大宿舍。

馬斐森心情幾靚，仲透露港大法律學院嚟緊會有新programme，就係同英國UCL合作提供雙學位課程，學生分別在港大及UCL讀兩年，了解亞洲市場之餘，亦可以擴眼界，畢業再考慮喺邊一度繼續發展。