囝囝霸屋企 陳鎮仁逼遷VTC酒店 大讚服務

噚日黛安去咗薄扶林T-Hotel同職業訓練局（VTC）主席陳鎮仁食晏。實不相瞞，今次係黛安首次到訪，酒店望到無敵大海景，加上噚日天氣好，景觀一絕。

話說呢間四星酒店，所有職員都係VTC讀緊書嘅同學仔，雖然佢哋尚未畢業，但服務水平同質素絕對不比下去，喺著名旅遊情報網Trip Advisor有不錯評價。

神秘入住 職員認出

席間陳主席自爆，曾經入住過酒店，大讚服務一流。黛安好奇：點解陳主席無啦啦走去住酒店呢？佢解釋，事緣囝囝有日請咗班朋友仔嚟屋企住，佢同太太為咗畀多啲空間後生仔，自己走咗出來住酒店。但臨時臨急，應該住邊好？身為VTC掌舵嘅佢第一時間諗起T-Hotel，打算順道感受一下入住體驗。

大家問佢Book房時有無「撻朵」話自己係VTC主席？佢搖頭話無，不過職員好醒目，睇見訂房資料好快就認得佢。佢笑言無意做神秘顧客，但總括嚟講，都好滿意酒店服務。