布甸狗快閃《晴報》 孖宅男女神「放電」

噚日一打開facebook，就見到Sanrio卡通人物布甸狗洗版，聽《晴報》姊妹講，布甸狗「出巡」係有任務在身㗎！今次快閃由《美女廚神》孫慧雪（阿雪）帶住電視劇《愛我請留言》入面嘅明星狗、「零零狗」Dior打頭陣。有宅男女神之稱嘅阿雪，連明星狗都畀佢「吸引」，一畀指示Dior就好聽話咁同大家打招呼，想stay定salute都無難度。《晴報》姊妹仲準備咗罐頭同布甸畀Dior，以為狗仔會揀罐頭就錯啦，佢鍾意食布甸㗎！

同大家selfie完，就到布甸狗壓軸出場，黛安睇《晴報》fb段片，耳仔郁下郁下嘅佢，真係好得意，一行出嚟已經「電暈」在場粉絲，個個攬住佢影相。影相之餘，布甸狗都緊記佢嘅任務，就係送出邀請卡。原來尖沙咀The One把握布甸狗20周年，同Sanrio合作打造「The One‧Pompompurin 20周年夢工場」，除咗有日本精品限定店，仲會有主題遊戲區，3月18日開幕，諗下都覺得期待！