黛安
黛安

我最喜愛商場大獎出爐 「拎住名單當購物指南」

發佈時間: 2016/03/03

我最喜愛商場大獎出爐 「拎住名單當購物指南」

黛安鍾意shopping,每次去唔同區商場都覺得似尋寶,皆因香港唔同商場都有自己特色,吃喝玩樂樣樣齊。成功打造人氣商場,全靠幕後一班好叻好有創意嘅精英。日前香港經濟日報集團舉辦午宴,獲邀嘅都係商場界精英,慶祝第四屆「我最喜愛商場大獎」圓滿舉行之餘,仲可以互相交流。

香港經濟日報集團董事總經理兼《晴報》社長麥華章都有出席,麥社長致辭時話,我最喜愛商場大獎表揚參與商場同特色商場活動,又笑言名單可以當購物指南,因為得獎商場經過嚴格遴選,評審團有多位市場學專家、學者同資深傳媒人之餘,仲請埋讀者同網上平台用戶參與投票,得獎絕對實至名歸。《香港經濟日報》副社長兼研究部主管石sir石鏡泉仲分享投資小貼士,話近期經濟前景不太樂觀,大家要留意,「唔會再有股票突然連升三個月,買入賺幾毫就要搵時機放。」

撰文: 黛安 消息特靈八卦公關
欄名: 八卦名利場