Ling Ling姐新書 教運動美顏

上星期去聯合出版集團春茗，見到《香港經濟日報》副社長兼研究部主管石sir石鏡泉同專欄作家Ling Ling姐李韡玲。每次見Ling Ling姐都好開心，對人好nice，仲會教黛安護膚新貼士。

原來唔經唔覺Ling Ling姐喺《香港經濟日報》寫專欄20周年啦！黛安最佩服係佢多年堅持，無論寫專欄定鑽研美容知識，20年如一日咁認真。今年《經濟日報出版社》再搵Ling Ling姐合作，聽講新書除咗美容養生，會重點教大家做運動，「身體好，皮膚自然更靚！」Ling Ling姐話到時會送本畀黛安珍藏，我就話：「最緊要有簽名版！」