員工做廣告主角 H&M新蹺請人

企業舉行大型招聘活動好常見，但好似時裝潮流品牌H&M咁，用戶外、店內到網上推出廣告請人，應該就唔係咁常見。黛安喺YouTube睇到片，H&M喺大中華區推出最大人才招募活動——「在這裏，我可以」（Place of Possible）。品牌搵咗44位員工做品牌大使，等員工用第一身分享自己喺公司嘅故事，用真實例子等大家了解品牌嘅企業文化、就業機會同晉升途徑等等。

H&M大中華區總經理Magnus Olsson咁樣講：「H&M無按部就班職業路徑，每位員工都能看到職業發展不同可能性。我們希望有時尚職業夢想的人才，可透過活動更深入了解H&M發展機會、競爭優勢同獨特企業文化，加入呢個能夠讓他們實現夢想嘅大家庭。」

網站設小測驗

今次招聘活動中港台澳一齊舉行，有人會問：「點先知道自己係咪適合呢份工？」品牌網站預備埋小測驗，上（career.hm.com）了解下有咩職位空缺之餘，仲可以睇埋佢哋員工分享同做個小測驗，睇下自己係咪佢哋搵嘅人才？