黛安
黛安

恒隆陳啟宗以身作則 帶仔仔一日「巡」4城市

發佈時間: 2016/03/07

恒隆陳啟宗以身作則 帶仔仔一日「巡」4城市

做義工幫人,人都開心啲,好似恒隆員工組成嘅義工隊嘅上星期六又出動!今次佢哋帶住20幾位基層長者一齊去咖啡店,學沖咖啡烘焙及沖泡方法。藝人河國榮仲現身支持,親自品嚐長者沖嘅咖啡。講起咖啡,唔知大家記唔記得,上次旺角家樂坊重新開幕,黛安分享過恒隆管理層齊齊去shopping兼歎咖啡,有人笑說表面睇,做管理層都幾歎吖!其實佢哋多姿多彩嘅行程背後,都有好多不為人知嘅「辛酸」。

好似恒隆董事長陳啟宗(Ronnie)大仔陳文博(Adriel,小圖),加入恒隆近六年,現職董事總經理行政助理,近排時不時都係恒隆event見到佢。Adriel講起跟爸爸一齊出差,最高紀錄一日行勻幾個城市!話說恒隆管理層一年起碼去內地開兩次員工大會,向同事講解公司政策外,聆聽員工聲音。近年集團擴展內地業務,不同城市都有業務,每次開會都要「夾到啱啱好」。Adriel話,最近呢次一日內就由哈爾濱去天津,再去濟南同昆明,飛機、高鐵、車都搭晒,每個地方一開完會就趕路,少啲魄力都唔掂!

另外,唔好以為「boss級」出差好舒服,貴為恒隆董事總經理嘅陳南祿(Philip)由濟南去上海坐搭高鐵都係坐二等艙,「二等每排三個位,行前一等每排兩個位,再行前商務仲正,可以瞓低。」集團傳訊助理董事關則輝(CF)笑住答,「梗係正啦,二等艙車飛400蚊人民幣,商務艙要1400蚊人民幣㗎。」

撰文: 黛安 消息特靈八卦公關
欄名: 八卦名利場