【聲明】港生活網站並無進行電話推廣活動

八達通新「嘟嘟」聲 提你換新卡

發佈時間: 2016/03/09

嚟緊搭地鐵,聽到八達通「嘟」聲唔同咗,變成一長一短,唔使擔心張卡壞咗,因為呢個係八達通公司嘅「換卡提示」!黛安聽八達通CEO張耀堂講,去年開始喺港九設立34部換卡機,等大家舊卡換新卡,享用網上服務等功能,但係200萬張舊卡入面,依家淨係換咗8萬張,「換卡情況唔太理想」。

為咗避免舊卡損壞會影響操作,八達通五月開始就會推出新提示聲音,如果大家手頭上嗰張仲係舊卡,每次使用時,讀卡機就會有一長一短「嘟、嘟」聲提提你。張耀堂仲話,有新提示聲音,大家容易啲知道自己需要換卡,過程仲好快㗎咋,只需要大約一分鐘,舊卡優惠積分、餘額等資料就會自動轉移到新卡。

張耀堂又講起,八達通將領取新牌照繼續營運,因新法例容許電子貨幣儲值上限達3,000元,八達通都計劃將最高儲值額由依家1,000蚊增加到3,000蚊。

撰文: 黛安 消息特靈八卦公關
欄名: 八卦名利場