黛安
黛安

莆田大廚炮製鮑魚宴

發佈時間: 2016/03/11

莆田大廚炮製鮑魚宴

苦瓜可連籽食?聽莆田餐廳大中華區執行總廚陳世杰講先知,「好的苦瓜可連籽一齊煮」,陳師傅揀咗「紅籽苦瓜」配南日島鮑魚煮「涼瓜燜鮑魚」,做莆田食材節其中一道主打,食到個個舔舔脷。陳師傅話紅籽苦瓜勝在燜完無苦味,黛安平日唔太食苦瓜都食多咗兩塊,鮑魚燜得入味,配搭真不錯。

莆田鮑魚節一共有四道菜,冰鎮南日鮑、涼瓜燜鮑魚、石斛番鴨燉鮑魚以及迷你飯糰扣鮑魚。試完菜明白點解莆田由新加坡來港短短兩年,已經成功獲得米芝蓮推介,相信大廚對食材同煮法嘅認真講究,絕對應記一功。其實今次「鮑魚節」盛宴只係莆田食材節第一擊,黛安聽公關講,四款鮑魚菜式供應期至今個月底,之後莆田仲有三樣食材節主題,分別係海蟶、黃魚同紫菜。

陳師傅即席示範燜鮑魚之外,仲教咗黛安三招揀紫菜。唔講唔知,原來靚嘅紫菜,唔使煮都可以就咁食,係屋企睇戲時當小食,口感一流。陳師傅話,揀紫菜有口訣可以記,「一看二食三泡水」。首先從外表看,品質好嘅紫菜顏色相對更有光澤;其次,放入口食到鮮甜味。最後將紫菜放入大概40度熱水,如果紫菜品質差水會變混濁,大家仲可以夾起浸完嘅紫菜睇睇,原來愈幼身代表紫菜愈嫩口。

撰文: 黛安 消息特靈八卦公關
欄名: 八卦名利場