Zalora香港新營運總監上陣 今年計劃攻美容產品

唔經唔覺，大型網購平台Zalora香港四歲生日啦！噚日黛安出席品牌午宴，原本以為品牌會分享2016年大計，原來唔止咁簡單，品牌正式公布香港營運總監一職由Luca Barberis接任。來自意大利的Luca，外表好年輕，言談間發現，佢真實年齡仲年輕，只有29歲。大家驚訝，全因為呢位新任揸fit人嘅履歷好豐富。來港上任前，負責Zalora馬來西亞地區嘅業務，成功帶領品牌成為當地其中一個首屈一指網購平台；而加入Zalora前，任職Google，佢負責嘅客戶個個每季盈利超過600萬𠻹！

親自去韓國搵美容產品

上任數星期，Luca透露，香港的網購業務相對台灣等地發展得慢，但品牌好有信心，今年會再度擴充原來只有12人嘅buyer團隊，更說：「有信心香港可以成為採購中心，不止為香港客戶尋找新品牌新產品，香港團隊應該可以為品牌其他國家做採購。」

除咗時裝之外，Luca仲講到，今年有計劃開設beauty路綫，嘗試引入韓國等地的美容或化粧產品，更說最近就會出發到韓國，先從尋找大型品牌開始。