「精靈系男模」Lucky Blue 做L'Oréal Men Expert新代言人

睇到超級男模Lucky Blue Smith嘅相，好多姊妹都會忍唔住變咗「心心眼」。呢位男模人氣有幾勁？未成年已經憑「精靈系」外表俘虜萬千粉絲，出道無幾耐已經活躍倫敦、米蘭同巴黎最大時裝品牌演出，instagram隨便一張相都過十萬個Like。

最近，連L'Oréal Men Expert都話，Lucky Blue就係品牌理念強調嘅Alpha Male，正式宣布搵佢做全新全球代言人。品牌以往選用嘅代言人都係大家好熟悉嘅知名男星，例如男神吳彥祖、阮經天等等，今次揀Lucky Blue相信係睇中佢喺社交媒體嘅影響力。唔知大家有無印象，舊年運動品牌邀請佢嚟香港做宣傳，佢喺社交媒體預告之餘，不斷分享現場自拍，結果粉絲逼爆機場同活動現場，有人話魅力媲美韓國巨星訪港！

難怪L'Oréal Paris環球品牌總監Cyril Chapuy大讚佢係「社交媒體合力創造出來的超級男模」，而且係當代Alpha Male，呢一代社交媒體嘅潮流領袖，無論男士同女士都喜歡他。