官恩娜更衣室餵人奶遭投訴

去年十月誕下兒子bébéG的官恩娜（Ella）昨午在fb發文控訴在酒店女更衣室餵哺母乳時，竟被一名中年女性出言侮辱，事件觸動網民神經。帖文短短六小時已勁吸逾二萬個Like，全城疾呼餵母乳被當異類太過分，大家又撑唔撑Ella向歧視說不？

去年二月與中法混血兒醫生Juan-Domingo Maurellet結婚的Ella，於同年十月榮升媽媽，誕下小王子bébéG。Ella曾在社交網發布其小王子的吮手指相及出浴照，囝囝輕鬆賣萌呃like。貴為新一代靚媽，Ella亦支持餵哺母乳。然而，昨午Ella卻在fb上載一張於超巿奶粉貨架前的抱B自拍照，並發文申訴餵母乳時遇上不快經歷。

冀宣揚母乳餵哺

事緣日前她在某五星級酒店由於找不到育嬰室，逼於無奈下於女更衣室餵哺母乳給五個月大的bébéG，豈料竟碰上一名中年女人發難，故意在bébéG頭殼頂高聲講電話向酒店各部門投訴有人餵人奶，嚇得Ella的寶貝仔「喊出嚟」，初為人母的Ella當時亦天然呆不懂反應。

事後，Ella苦呻不明白何解仍有人對餵母乳有偏見，又以這樣的方式對待一個只有五個月大的嬰兒，令其心「好唔舒服」。不少網友也力挺Ella在女更衣室餵奶無罪，認為應有更多名人發聲宣揚母乳餵哺；有人亦鬧爆該中年女子無教養。

本報記者昨午聯絡到Ella，她說：「因為當時對方好似好緊張，而且自己都同BB一齊，同埋佢講嘢嗰時好近自己同BB同埋好大聲，所以自己嗰下真係嚇到呆咗！」她坦言害怕嚇親BB因此未有正面理論，並稱：「佢打完電話投訴完之後走咗，冇幾耐都有酒店職員走入嚟同我講唔好意思！」她又表示：「我冇諗過依家仲有人對餵人奶有偏見，希望可以為所有餵人奶既媽媽爭取下，另外有時去到啲商場或酒店好多時佢哋嘅育嬰室都冇設施畀媽媽餵人奶，要抱住一個20磅嘅BB一邊餵人奶一邊企喺度係一件好困難嘅事！」

撰文：Steven、Pat

編輯：余運慶

插圖：何樂

設計：鄧俊明