西環小店 必試小食

西環一直在變，新建築、新食店登場，帶來新衝擊；還幸在新事物外，仍有不少街坊店在默默經營，趁昔日味道還在，把握機會來品嘗吧！

值得等即製烤雞髀

此店小食特別多：魚蛋、燒賣、煎釀四寶、碗仔翅、腸仔、炸墨魚嘴等統統都有，論最受歡迎，一定是烤雞髀。柯打後即時烤製，雖然要等15分鐘，但好值得。雞髀大件頭，香噴噴，皮薄肉滑，加上椒鹽、辣粉等調味，更香口。另有炸雞髀、醬汁雞髀等，啖啖肉好滿足。

真滋味美食

地址：西環卑路乍街163號地下

電話：2904 9486

30吋超大薄餅

西環都有大Pizza食！一個足有30吋，有小茶几枱面般大！從玻璃窗見師傅搓餅底做薄餅，拋上拋落還以為有UFO飛過！設散件外賣裝，雖然細一點，也有26吋，分量如一般Pizza的兩份。每日有八至十款口味選擇，選好後由店員即時翻熱；招牌口味有The Grandmaster，餅底薄脆又不失嚼勁，餡料多，有意大利Salami、肉腸、洋蔥和燈籠椒等。最大的30吋及16吋裝則只限原個柯打。留意舖頭下月會搬到附近堅尼地城海傍營業。

Checkmate Pizza

地址：西環堅尼地城爹核士街7號

電話：2797 9999

老店蓮蓉雞尾包

茶餐廳始於1967年，是「西環三寶」之一，布置多年不變，前舖後工場、高樓底、二樓雅座，有閒情可坐低懷舊兼打卡。一如傳統茶記在門口有一個包點櫃，麵包、蛋撻、雞批等每日新鮮出爐，最特別是蓮蓉餡雞尾包，質感實在，蓮蓉餡夠綿滑，其他地方未必吃到。

祥香茶餐廳

地址：西環卑路乍街107地舖

電話：2855 7911

攝影（部分）：Lego

編輯：魏雋

設計：Simon