第一次跳街舞 劉鳴煒自嘲似機械人

「Wow！估唔到男神識跳街舞，好型呀！」噚日黛安收到好友傳來的絕秘短片，片中男神正是被外界稱讚「成個Package都好好」嘅華置主席劉鳴煒。舞姿雖未到爐火純青，但睇到出佢的確下過苦功。

唔講唔知，原來今次係劉鳴煒出世35年來初次接觸跳舞。佢之所以獻出第一次，乃應活動統籌紀文鳳所邀。當時佢接到電話，一聽到係幫協青社，諗咗五秒就應承，但收綫後開始後悔，事關自己喺跳舞同音樂方面可謂零認識同零天份。佢自爆第一次上堂，自己跳到成個機械人咁，手腳好唔靈活，多得街舞老師阿齊循循善誘指導，至有今日咁嘅成績。如今佢一有時間，無論喺辦公室抑或沖涼房，都會把握時間練舞。

教佢跳舞嘅阿齊以前係高危青年，常流連街頭，係街舞改變佢，今日更成為街舞導師。劉鳴煒大讚恩師觀察力強，能拆解學生問題教對方改善。

席間有人問劉鳴偉作為富二代點睇邊青問題。佢話喺跳舞呢件事上，大家起跑綫相同，與背景及身份無關，佢亦鼓勵年輕人尋找興趣，發揮200％努力，實現夢想。