熊本熊變搖滾結他手 周末一田開騷

平時大家生日，相信只會慶祝一、兩日，同屋企人、朋友食飯。日本吉祥物熊本熊就巴閉得多，生日咁大件事，梗係成個月都要慶祝啦！繼早前宣布喺香港推出首張熊本熊肖像信用卡，聽日開始，一田更會幫呢位部長舉行為期兩個禮拜（22/3-5/4）嘅「Kumamon Fans感謝祭」。

三間位於沙田、大埔同荃灣嘅一田百貨，聽日起將同步推出逾50款獨家限定精品同服飾；去到星期六、日（26-27/3）仲會喺沙田一田開騷表演。聽講熊本熊近排秘密練舞，打算生日Party上向粉絲騷Quali，仲會變身搖滾結他手，以型爆造型亮相！

黛安有啲擔心，熊本熊成日都咁蝦碌，咁大陣仗嘅表演，到底佢應唔應付得來？