Doraemon Run賽道多誘惑 泳兒：要忍住唔影相！

「面對四周打扮成多啦A夢嘅跑手，既要忍住影相嘅慾望，又要集中精神比賽，心情真係好複雜！」好多人話，參與賽跑最緊要係堅持；但對於參加過「Doraemon Run」嘅歌手泳兒嚟講，最難唔係堅持，而係集中精神！事關喺跑嘅過程中會遇到好多悉心打扮、造型特別嘅跑手，賽道旁邊仲有好多漫畫入面嘅經典場景，要忍手唔影相，確係高難度。

雖然噚日天氣一般，天陰陰又潮濕，但都無損黛安嘅興致，晨早起身去到西九海濱長廊同過萬位志同道合嘅老友，一齊參與本港首屆「Doraemon Run」。

雖則話係賽跑，其實玩多過跑，因為賽道中有多個障礙關卡，例如巨型滑梯、三角迷陣同水管隧道，途中仲有多個多啦A夢影相區，大家跑兩步就停低影相，搞咗好耐先跑到去終點。不過無所謂啦，最緊要大家玩得開心嘛！