被指嫌公司大細超 安仔否認借醉鬧Fiona

有報道指早前在太陽娛樂春茗上，許志安被目睹竟借醉當眾喝罵薛凱琪（Fiona），有傳是不滿公司將資源集中在Fiona身上，安仔昨日在活動上回應稱已事隔一段日子，對傳聞一笑置之。

許志安昨日以嘉賓身份到灣仔利東街，出席首度進駐香港的Calbee PLUS概念零食店開幕禮，席上與四洲集團太子女戴凱欣一齊剪綵，安仔即場試食薯片後以日語高呼「Oishi（好味）」，全場一片笑聲。

有傳他上月參與太陽娛樂春茗時，因為不滿公司大細超，於是借醉大罵薛凱琪。安仔聞言後笑一笑說：「好耐喇喎，唔使回應啦，得啖笑。我呢世人冇乜點鬧人，亦好彩冇乜畀人鬧過。（對公司資源分配有微言？）唔知點回應，都咁耐，得啖笑啦。」

愛去日本歎美食

提到太太鄭秀文（Sammi），安仔坦言最愛去日本旅行，有機會就與Sammi一齊發掘地道美食，過程非常開心。問到日本是否拍拖勝地？安仔笑謂：「唔係，我周圍都去，但唔會去日本曬太陽。」不過每次去日本前都會先減肥，怕吃得太多谷肥自己。

其實安仔以前對食可謂沒有要求，只求填飽個肚，但近年對飲食開始有要求，當然Sammi的廚藝亦相當了得，他豈能忍口？安仔笑言：「最近好想keep fit，生活方面非常自律，唔食宵夜，所以叫佢（Sammi）唔好煮嘢食。」

採訪：Pauline

攝影：Lego

編輯：陳禮恒

設計：鄧俊明