海洋公園蹺王李繩宗 接棒苗樂文做CEO

服務海洋公園22年、現任副行政總裁的李繩宗（Matthias），今年八月會從行政總裁苗樂文（Tom）手中接棒，成為海洋公園首位華人CEO。黛安噚日去海洋餐廳同幾位管理層飯聚，主席孔令成（Leo）大讚Matthias經驗豐富，仲話：「佢唔只睇盤數叻，marketing方面度蹺都好掂。最近推出買成人飛送細路飛、之前大熊貓生日都係佢嘅idea。」

經驗豐富 好蹺多多

今年經濟預期較差、上海迪士尼開幕在即等因素下，個個見到Matthias都問壓力大唔大、海洋公園發展有咩方向。Matthias回答時從容淡定：「大環境影響之下，內地旅行團減少，今年首季人數比去年同期，有雙位數字跌幅。」他亦細數未來吸引遊客的因素，南港島綫有望年底通車、水上樂園2018年完工、兩間酒店亦將相繼落成，對前景有信心。在海洋公園工作多年，經歷金融風暴、沙士，見證過入園人次創新高，高高低低之間，今年所謂利淡因素對他而言似乎不足為懼。

即將卸任嘅苗樂文亦認為由Matthias繼任行政總裁是最好的選擇。他笑指自己和Matthias有一段淵源，因為「苗樂文」三個字正是Matthias所改，雖然不知其意，但苗樂文話好鍾意呢個名。