火爆監製VS淡定廚神 祥仔毛毛鬥氣鬥出溫情

長壽處境劇《愛．回家》曲終人散，接棒的新劇《八時入席》起用黃金組合黎耀祥與毛舜筠擔正。二人已第三度合作，飾演燥底工作狂的祥仔集集鬧人，相反性格溫文的毛毛以柔制剛，擦出不一樣的火花。

新劇以電視台作背景，婦女節目監製祥仔因大廚失場，以秘書毛毛頂替教授烹飪，意外大受師奶觀眾歡迎。監製邵麗瓊及羅鎮岳笑言希望帶給觀眾新鮮感，才會以綜藝節目製作為處境劇題材。「其實電視台就似平日辦公室職場，而且毛毛本身喺法國藍帶學院學廚，我們唔想浪費佢嘅才華，所以安排佢做廚神，喺劇中展現廚藝。」

不排除crossover馬家

處境劇向來主打家庭溫暖，兩位監製希望將晚上八時的播映時段，打造成一系列《愛．回家》品牌。「以前馬家嗰種傳統大家庭式日日都一齊，其實係幾唔現實，所以今次新劇描寫嘅家庭現代感較強，毛毛家中只得孻叔陳國邦同弟弟，而祥仔就同爸爸鍾景輝相依為命。」將來劇集會否加插極受歡迎的馬家？他們笑說：「將來冇嘢冇可能，我哋好珍惜《愛．回家》時段，希望發放開心、溫馨嘅正能量。」

撰文：李潔盈

攝影（部分）：Lego

編輯：林梓添

設計：梁政敏