【聲明】港生活網站並無進行電話推廣活動

一場貪婪的雀局

發佈時間: 2016/04/06
  • 1,000次
    分享

正如電影《沽注一擲》(The Big Short)中,世紀金融海嘯發生前夕,投資市場仍在瘋狂地貪婪,國家債務不斷膨脹,形同計時炸彈。

冰凍三呎,絕非一日之寒,揮霍時何其興奮,埋單時卻無比痛苦,美、歐、中、日,有如一枱麻將四隻腳,各自有本難唸的經(濟),有人心急約齊腳想從麻將枱上搵啲使用,冇現鈔,索性自攜籌碼,總好過賭「白頭片」,立心以籌碼換走其他幾家的真金白銀。

可惜,雀腳中位位原來單料同煲、各懷鬼胎,人口老化、失業率長期高企、四分五裂的歐洲,一直坐美國下家等上家鬆章,早幾年上家自身難保,斷水斷糧,陪打「燉」腳,同樣要自攜籌碼;日本在美國上家,早已瘋狂買美債,真金白銀明益下家;只有坐在美國對家的中國,以為可以時間換取空間,鋪鋪歎慢板,明明約法三章三番起糊,雞糊又食、詐糊、大相公、小相公亂叫一通,章法大亂,典型麻將小學雞,擾亂市場秩序,對家美國明明睇死你呢鋪食唔出,偏偏你又突然自摸,上下家始料不及、陣腳大亂。

其實只要看得通,都知做莊的美國只顧睇住自己一家牌,而且大雞唔食細米,夢想做鋪大牌,可惜不時要被其他幾家尤其下家嚇到一額汗,惟有棄糊投降之同時,其他中、日兩家,即使一心想以時間換空間、不出沖博摸和,亦難免隨時被打亂部署,考驗應變能力。

撰文: 胡孟青 港媽、財經評論員
欄名: 留給囝囝