學生出書講未來 特首夫人讚有創意

經常都話讀書能夠增長知識，豐富幻想。最近就有300位學生哥由小讀者化身小作家，共同出版咗一本名為《我們一起悅讀的日子》，為我哋嘅未來城市獻計。有學生撰文話希望未來可以住喺天空中，世界可以環保啲、空氣清新啲；有人就希望未來會好似漫畫《多啦A夢》嘅世界，熟知你喜好嘅機械人服侍、吃下記憶麵包就可以變得有記性，創意多多。

特首夫人梁唐青儀都係呢本書嘅忠實粉絲，噚日佢喺新書發布會上，直言對小作者們瞭闊嘅想像空間大開眼界，令佢對本書愛不釋手。佢一邊睇嘅時候，仲將書中喜愛嘅段落用熒光筆間低，相當用心。

梁太又特別提到，書中有位小作者盼望未來城市係個人人有屋住嘅地方，無論幾大嘅公屋，租金都唔好超過1000蚊，唔知梁太返屋企會唔會同特首反映下呢？